Na provincia de Lugo hai 15 beneficiarios, aos que se lles concederon achegas por un importe global de 33.600 euros. Do total dos expedientes subvencionados, 6 dos solicitantes son homes e as 9 restantes, mulleres.

A convocatoria desta axuda, tras resolución da Secretaría Xeral de Igualdade con data 15 de maio de 2018, tiña como finalidade fomentar a corresponsabilidade familiar e favorecer a conciliación da vida familiar, laboral e persoal. A contía oscila entre os 1.700 e os 3.700 euros e determínase en función da porcentaxe da redución da xornada e a súa duración, e do número de fillos a cargo da persoa solicitante. 

As achegas recaerán en homes ou familias monoparentais que se acolleran á medida da redución da xornada entre o 1 de xuño de 2017 e o 30 de xuño de 2018 tendo ao seu coidado fillos ou fillas menores de 3 anos, ou menores de 12 naqueles casos nos que teñan unha discapacidade igual ou superior ao 33%.

As persoas beneficiarias das achegas teñen ata o día 26 de decembro como data límite para presentar a documentación xustificativa requirida e así poder percibir os importes que lles correspondan.

O delegado territorial, José Manuel Balseiro, salientou que as medidas para fomentar a corresponsabilidade e favorecer a conciliación son prioritarias para o Goberno galego e que aumentaron un 25% respecto á anterior convocatoria. O orzamento global dirixido na comunidade a estas axudas, cofinanciadas co Fondo Social Europeo (FSE) nun 80%, ascendeu a 554.000 euros.