Na reunión, que se celebrou no despacho do máximo mandatario galego en San Caetano, en Santiago de Compostela, ambos puideron avanzar nalgunha das iniciativas nas que traballa o Goberno local, como é o caso da construción dunha praia fluvial no río Mao, que se prevé emprazar nun espazo que puido coñecer o presidente na súa última visita a Bóveda.
Ambos os mandatarios trataron tamén sobre as posibilidades de solo industrial no Concello de Bóveda ante a alta demanda que existe. Aínda que estes foron os temas principais da xuntanza, tamén estivo sobre a mesa a aula forestal do viveiro dos Trollos, un espazo para o que o Goberno local conta co apoio da Xunta de Galicia a través de diferentes axudas.
O rexedor, José Manuel Arias, agradece a boa disposición do máximo mandatario autonómico de cara a colaborar cos proxectos en marcha e desexa que pronto sexan unha realidade. Destaca, así mesmo, o compromiso continuado da Xunta de Galicia coas iniciativas que o Goberno local vén levando a cabo no Concello de Bóveda.
A reunión forma parte dunha serie de encontros que vén de iniciar este ano o rexedor para conseguir apoios e axudas doutras administracións para levar a cabo “importantes iniciativas para o impulso da localidade”.
