A estrada provincial 5901, que une Sober con Canaval leva anos con múltiples fochancas e cun tramo estragado pola escorrentía de augas dende a ladeira de Sistín do Mato. Explican desde Agroma Sober que está previsto que ADIF amañe a estrada, pero consideran “necesario actuar con medidas de seguridade namentres non se resolven os problemas. A estrada é perigosa, sobre todo cando chove, coma estes días, e pode provocar saídas de vía”.
Consideran que mentres non se arranxa, sería necesario que se volvera parchear ou, canto menos, que se coloquen sinais de perigo e redución de velocidade, especialmente no tramo inundable por baixo de Sistín do Mato. De feito, tamén solicita Agroma Sober trasladar á Deputación de Lugo e a ADIF a necesidade de que o futuro proxecto de mellora da estrada LU-P-5901 (Sober-Canaval) contemple unha solución estrutural para o tramo inundable á altura de Sistín do Mato.
Así mesmo, a estrada de Vilela (estrada municipal á que se accede desde esta vía provincial) presenta problemas similares, tamén moi afectada polas correntes de auga, polo que tamén piden ao Concello unha solución. “Tomé vai destinar case 60.000 € ao asfaltado dun camiño que non leva a ningures en Antas de Ulla, para seguir enterrando cemento nun suposto Parque Central de Galicia que só está destinado a facer propaganda da Deputacion e do seu Presidente. Entende Agroma Sober-IGV que o prioritario debería ser manter en bo estado as vías provinciais máis utilizadas, coma esta estrada Sober-Canaval, que está en estado lamentable” conclúen.
