Esta obra nace da moción presentada polo PSdeG-PSOE no pleno de decembro de 2024 e aprobada coa finalidade de desbloquear un proxecto esencial para a vila. A proposta incluía tres pasos clave: dirixirse formalmente á CHMS, modificar o PXOM para dar encaixe urbanístico á obra e consignar unha partida orzamentaria municipal. “Pasaron seis meses e o Goberno local non fixo absolutamente nada. A súa inacción é alarmante e pode facer que Chantada perda unha oportunidade histórica”, advertiu o voceiro socialista, Mariano López.
Segundo explican os socialistas, a CHMS remitiu hai máis dun mes e medio, un borrador de convenio para formalizar a colaboración e poder avanzar no proxecto. Sen embargo, o Concello segue sen dar resposta. “Non hai desculpa posible. Hai financiación, hai apoio institucional e hai demanda social. O que falta é vontade política e capacidade de xestión”, denunciou López Nieves.
Desde o PSdeG-PSOE lembran que a nova ponte permitiría solucionar os problemas de tráfico e perigosidade viaria que sofre o barrio da Ponte, revalorizando unha zona histórica, patrimonial e cada vez máis transitada por estar en pleno Camiño de Inverno. “Esta obra non é só unha mellora na mobilidade, é unha aposta pola recuperación urbana, pola convivencia e polo futuro dunha das zonas máis emblemáticas da vila”, sinalou o voceiro socialista.
Os socialistas de Chantada insisten en que esta oportunidade non se pode perder. “Estamos a falar de máis de 4 millóns de euros que xa están enriba da mesa. Non podemos permitir que o desleixo e a pasividade institucional freen un proxecto que leva décadas reclamándose. Chantada merece moito máis”, concluíu López Nieves.
