Desde Esperta Monforte aseguran defender o Malecón como espazo esencial para a cidade, “un refuxio emocional, unha xanela aberta á vida social, cultural e económica de Monforte. Alí celébranse concertos, mercados e actividades deportivas e, ata hai unhas semanas, tamén albergaba locais como o bar Anchoas, que durante anos foi símbolo do verán e do espírito monfortino”.

Demandan un modelo de cidade que poña ás persoas no centro, que reforce os espazos
de convivencia e que promova proxectos sostibles, “Converter este espazo nun proxecto de infraestruturas fracasado, como construír unha ponte que divide en lugar de unir, é un erro que pagaremos caro en termos de cohesión social, revitalización económica e calidade de vida”.

Con todo, Esperta Monforte, oponse ao peche e demolición do emblemático Bar Anchoas, e pregúntanse se está relacionado coa solicitude de permisos para a construción da anunciada ponte de ferro. A formación política esixe:

• A protección e revitalización do Malecón como espazo público para a cidadanía.
• A procura de alternativas para garantir a continuidade de lugares emblemáticos como O Anchoas, que forman parte da nosa identidade.
• O rexeitamento de proxectos como a ponte que fragmentarían este espazo e priorizarían o formigón por riba da vida comunitaria.
• A apertura dun verdadeiro proceso participativo, onde os veciños decidan o futuro do noso Malecón.
• Monforte merece máis: merece unha cidade viva, acolledora e que non perda a súa esencia