Antonio Ameijide sinala que o malestar entre os veciños de Sober é notorio porque esta estrada é a conexión que teñen coa N-120. “Nós mesmos comprobamos como os vehículos teñen que reducir considerablemente a velocidade para poder minimizar os efectos das enormes fochancas que invaden a estrada, incluso os vehículos pesados teñen que modificar a traxectoria para evitar danos”, explicou.
Cos danos ocasionados nesta estrada as fochancas permiten ver o firme vello, “Isto implica que as fochancas teñen varios centímetros de profundidade o que engadido á gran lonxitude que teñen sexan moi perigosos para a circulación”, explicou.
Asegura que o que xerou maior malestar entre os veciños foi que se reparou unha parte da estrada, dun quilómetro aproximadamente, deixando a parte restante, con máis dun quilómetro, sen actuación algunha.
Ante esta situación, dende o Grupo Provincial Popular piden á Deputación que inste a Adif a reparar todos os danos ocasionados polas obras para “garantir a seguridade” dos usuarios desta estrada provincial.
