Despois de ter presentado distintas iniciativas, o Partido Popular anuncia que volverán dirixirse formalmente ao Ministerio dende ambas cámaras. As deputadas autonómicas do PPdeG, Katy Varela e Raquel Arias seguen a esixir a súa mellora ante o seu alarmante mal estado e tendo en conta que é unha vía fundamental para a mobilidade do sur da provincia de Lugo
As parlamentarias populares lideraron unha iniciativa na que se instaba á Xunta de Galicia a demandar ao Ministerio de Transportes e Mobilidade Sostible:
- A rehabilitación integral do firme da Nacional 120 desde O Barco de Valdeorras ata Ourense, así como a construción dos carrís adicionais comprometidos entre Os Peares e Ourense.
- Reiterar a solicitude da execución das obras de mellora da seguridade viaria anunciadas polo Ministerio de Transportes e Mobilidade Sostible no BOE do 30 de abril de 2024.
Desde aquela, aseguran que o Ministerio limitouse a realizar pequenas actuacións de parcheo, “claramente insuficientes para dar solución aos graves problemas que presenta esta infraestrutura” e que as inclemencias meteorolóxicas empreoraron facéndoa “absolutamente intransitable, con fochancas, firme deteriorado e evidentes riscos para a seguridade dos condutores”.
Os populares subliñan que un dos treitos máis afectados é precisamente o que une Sober con Monforte de Lemos, onde o deterioro do pavimento compromete seriamente a seguridade viaria e prexudica tanto aos veciños como á actividade económica da comarca. “As actuacións puntuais non son suficientes. O que precisa a N-120 é unha intervención integral e planificada que garanta a seguridade e a dignidade dunha estrada esencial para o sur de Lugo”, sinalan os populares.
Os deputados populares reclaman ao Goberno do Estado que asuma as súas competencias e cumpra cos compromisos adquiridos, poñendo fin ao abandono dunha vía clave para a vertebración territorial e o desenvolvemento económico da comarca de Lemos e de toda a provincia.
