Segundo o BNG, na rúa Cima de Vila, preto da Praza Maior, hai un nutrido grupo de vivendas, que non dispoñen de saneamento nin beirarruas, a pesar de que este chega moi preto das súas casas e a de que os veciños o levan solicitado en múltiples ocasións.

Os nacionalistas xa levaron a pleno, o pasado 31 de agosto, o malestar da veciñanza pola falta de dotacións de saneamento para esta céntrica rúa de Escairón. Agora piden, que xa que a Xunta vén de sacar unha liña de subvencións para este fin, en concellos de menos de 5000 habitantes, que se solicite para este fin.

“É tan difícil de crer que vivindo no centro urbano de Escairón, pagando IBI de máis de 800 €, estas casas carezan dun servizo tan básico e esencial en pleno século XXI”, declara a concelleira do BNG Antía Nieves. Os nacionalistas reclaman unha solución urxente a este problema e que xa que a veciñanza paga impostos, que poida contar cuns servizos mínimos.