A moción, que presentou Por Chantada, basébase na posibilidade legal que teñen os concellos de introducir bonificacións de carácter social no IVTM, ao abeiro da normativa estatal, e seguía exemplos xa aplicados noutras administracións locais. A proposta incidía, asemade, na realidade dun concello como Chantada, con 36 parroquias e importantes carencias en transporte público, onde o uso do vehículo é fundamental para acceder a servizos sanitarios, sociais e asistenciais.
Desde Por Chantada subliñan que o obxectivo da iniciativa era avanzar cara a unha fiscalidade máis xusta e recoñecer o papel das persoas coidadoras, que asumen unha carga física, emocional e económica significativa. “A mobilidade é esencial para garantir unha vida digna, especialmente no rural. As persoas coidadoras fan un labor imprescindible e o mínimo é que a administración lles facilite a súa tarefa”, sinala o voceiro, Antom Fente. Para Por Chantada – Interior Galego Vivo, o rexeitamento desta moción supón “perder unha oportunidade de adoptar unha medida socialmente xusta, legalmente viábel e cun impacto directo na vida das familias”.
A formación insiste en que seguirá defendendo propostas que melloren as condicións de vida da veciñanza e reclama ao goberno local “máis coherencia entre o que se di e o que se vota”. Lembran desde Interior Galego Vivo, que recentemente impulsaron as I Xornadas da comunidade centradas na cuestión migratoria e insisten na importancia dos coidados e nas deficiencias da rede pública neste campo. De feito, entre as conclusiós considérase esencial reivindicar e dignificar os traballos de coidados, “como os intrinsecamente esenciais para a vida, esixindo a súa revalorización e o tratamento como servizo necesariamente público”.
