O BNG de Monforte levará a pleno unha moción para a ampliación e mellora da área de autocaravanas existente na cidade, porque consideran que a infraestrutura actual quedou pequena e insuficiente para dar resposta á demanda. Lembran que o turismo en autocaravana está en pleno auxe, con milleiros de vehículos en circulación no Estado e un crecemento sostido en toda Europa.

Neste contexto, a Ribeira Sacra está a posicionarse como un destino atractivo para este tipo de turismo, cunha rede de áreas repartidas por distintos concellos, pero con capacidades moi reducidas na maioría dos casos, o que incrementa a presión sobre puntos clave como Monforte. O concelleiro do BNG en Monforte, Manuel Luaces, advirte que “o problema non é que non veñan autocaravanas a Monforte, o problema é que non estamos preparados para acollelas en condicións. Estamos a falar dun turismo que xa está aquí, que consume no comercio local e na hostalaría, e que non require grandes investimentos para xerar retorno económico”.

Neste sentido, o BNG propón:

• A ampliación da área actual ou a creación dunha nova zona con maior capacidade
• A dotación de servizos básicos como auga, baleirado, iluminación e conexión eléctrica
• A integración desta infraestrutura nunha estratexia turística ligada á Ribeira Sacra

“Monforte ten unha posición privilexiada como porta de entrada á Ribeira Sacra, pero non abonda con telo, hai que estar á altura”, sinalou Luaces. Dende o BNG consideran que non actuar nesta materia supón perder oportunidades económicas reais, xa que moitos visitantes vense obrigados a marchar a outros concellos por falta de espazo ou de condicións axeitadas. “Non estamos propoñendo crear unha demanda, estamos respondendo a unha realidade que xa existe. Ou nos adaptamos ou quedamos atrás”, conclúe o concelleiro nacionalista.