Os deputados do Grupo Provincial Popular denuncian a actitude do PSOE e da presidenta da Deputación, Carmela López, que votaron en contra da súa iniciativa para anular o convenio de 1,8M€ destinado á construción dunha nova ponte aberta ao tráfico na zona do Malecón de Monforte, “a pesar de que o proxecto conta cun rexeitamento social masivo e cuxo único obxectivo é “cumprir co peaxe imposto polo deputado non adscrito e alcalde monfortino, José Tomé”.
O voceiro provincial popular, Antonio Ameijide, denuncia que Carmela López amosa unha “submisión absoluta” cara á figura de Tomé, “É inadmisible que a Deputación destine os recursos públicos de todos os lucenses para blindar un pacto de goberno sustentado nunha persoa acorralada pola xustiza e coa que teñen unha débeda política que pagan cos diñeiros da provincia”.
Antonio Ameijide recordou que a proposta non buscaba retirar ningún investimento a Monforte, senón reconducilo cara a proxectos urxentes e necesarios. “Pedimos redefinir o convenio para que os 1,8M€ servisen para financiar a mellora integral da rede de saneamento e abastecemento de auga, unha demanda histórica e real dos veciños que o goberno socialista prefire ignorar, ou calquera outra necesidade que si reclama a veciñanza de Monforte”, sinalou.
O Malecón é un espazo histórico de convivencia e lecer monfortino, “Meter tráfico rodado, erguer unha estrutura de formigón e aceiro, talar árbores e afectar ao comercio local non é progreso, senón “unha barbaridade urbanística sen sentido técnico nin social”, insisten, mentres denuncian “o uso caciquil” que o PSOE fai da Deputación Provincial.
Pleno xullo Deputación Provincial / PP provincia de Lugo
