Interior Galego Vivo naceu en 2019 como rede que aglutina candidaturas municipalistas e movementos veciñais preocupados pola demotanasia, o despoboamento inducido por políticas caciquís que buscan convertir o interior galego nun territorio baleirado para o espolio de grandes corporacións e fondos de investimento. En menos dunha década, IGV consolidou proxectos municipalistas en varios municicipios das provincias de Lugo e Ourense. Contan cunha alcaldía en Vilardevós, que impulsa políticas destinadas “á cohesión social, á prevención de incendios e á mellora da calidade de vida das persoas no medio rural”, aseguran.
A nova Coordinadora de IGV contará con representantes de IGV Vilardevós, como a alcaldesa Tamara Balboa García; Antom Fente Parada de Por Chantada – IGV; Rubén Fernández Rodríguez, voceiro de Xuntos por Chandrexa – IGV; Paula Vázquez Verao, voceira de de Agroma Sober – IGV, Óscar Carrrete Lage, voceiro de Courel Vivo – IGV ou Jorge Lorenzo Vila, voceiro de Xuntos por Laza – IGV.
Municipais 2027
IGV presentarase a estes comicios formando parte da coalición Agora Galicia, que aglutina proxectos locais de todo o País e que, mantendo a autonomía e as siglas locais, busca o establecemento de alianzas a nivel local ou comarcal, ao tempo que suma votos cara as Deputacións.
O programa aprobado presta atención a retos do interior galego, “dende os devastadores incendios de última xeración, a necesidade de impulsar comunidades enerxéticas locais, fronte a proxectos industriais extractivistas no medio rural; a importancia de políticas públicas municipais de integración das persoas migrantes ou o impulso ao sector agrario galego.”
“O que a nosa xente agarda das e dos representantes municipais é que resolvamos problemas e saibamos actuar ante os grandes retos do presente,” asegura Tamara Balboa, “non precisa políticos locais preocupados por polémicas ou por medrar dentro do partido. Interior Galego Vivo debémonos exclusivamente á xente das nosas parroquias”.
IGV aposta por promover comunidades vivas e diversas que sexan resilientes tanto ante os riscos climáticos como ante os retrocesos democráticos, a este respecto os concellos son eixos fundamentais de actuación, “para facer políticas municipais con base nas comunidades locais das nosas parroquias. Espermos que máis persoas se sumen á revolta cívica das comunidades rurais do interior galego”.
