Nas alegacións rexistradas, Por Chantada sostén que o expediente non cumpre o artigo 37 do Real Decreto 500/1990, que esixe que os créditos extraordinarios se destinen a gastos concretos, determinados e inaprazables. “O que aparece no expediente non son investimentos perfeitamente definidos, mais partidas económicas xenéricas que poderán concretarse máis adiante. Iso non é o que permite a lei», afirma Fente.
Segundo explica o voceiro municipal, “non estamos diante dunha discusión sobre se Chantada precisa investimentos. O problema é que se pretende hipotecar o Concello durante dezasete anos sen identificar con rigor que obras se van executar. Despois de 30 anos na alcaldía que teña que recorrer a 4.8 millóns de débeda revela a súa nefasta xestión, mais o medo a perder os comicios, por iso o crédito ten tamén dous anos de carencia. Porque o único obxectivo é ter cartos á esgalla nas eleicións e logo, pasado o día, pasada a romaría e que pague a viciñanza a festa do PP”.
As alegacións recollen que o propio informe da Intervención municipal advirte de que esta operación provocará o incumprimento das regras de estabilidade orzamentaria, obrigando á aprobación dun Plan Económico-Financeiro que limitará durante varios exercicios a capacidade económica do Concello e traerá consigo incremento da presión fiscal.
Por Chantada agarda que o goberno municipal estime as alegacións e deixe sen efeito a aprobación inicial do expediente. “Non estamos diante dun simple trámite administrativo. Estamos falando da maior decisión económica do Concello en décadas. Cando se compromete o futuro financeiro de Chantada hai que actuar con transparencia, con planificación e dentro da legalidade. Iso é o que estamos a defender”, conclúe Antom Fente
