O BNG do Saviñao asegura que na parroquia de Fión a maioría das casas seguen sen contar cun servizo básico e faise “de modo discriminatorio”. “O artigo 26.1 da lei de bases de réxime local estipula claramente que o concello debe prestar o servizo domiciliario de auga potable. Non se entende que existindo a canalización de auga potable, non se lles permita aos veciños a posibilidade de conectarse a ela con todos os problemas que isto conleva”, explican desde o BNG.
Os nacionalistas din non entender que se propoña á Ribeira Sacra a Patrimonio da Humanidade pola paisaxe da auga e “que nesta zona o que falte sexa auga e humanidade” e aseguran que a deficiencia de servizos básicos nas parroquias máis alonxadas do centro urbano do concello é un problema que afecta de cotío a persoas de negocios da zona.
Á falta da auga da traída, o BNG engade deficiencias na recollida de lixo ou falta de limpeza dos camiños. Os nacionalistas lémbranlle ao concello que “tódolos veciños do Saviñao teñen os mesmos dereitos a recibir os servizos básicos e úrxenlle a solventar un problema que ten fácil solución”.
