O municipio de Folgoso do Courel conta cun patrimonio histórico, etnográfico e cultural de enorme valor, tanto polo seu interese histórico como pola súa capacidade para explicar a identidade, a forma de vida e a relación co territorio das xeracións que os precederon.

“Moito patrimonio xa se perdeu e moito do que queda atópase sen identificar, sen inventariar, sen sinalizar ou en situación de progresiva deterioración, co risco de que elementos singulares da nosa cultura desaparezan sen que exista constancia suficiente da súa existencia ou do seu valor”, destacan.

Merece unha atención especial o Castelo do Carbedo, malia que o castelo conta cunha protección patrimonial, xa fai 32 anos que é Ben de Interese Cultural, “a súa situación actual de abandono fai necesario que as administracións competentes dean os primeiros pasos para coñecer con exactitude a súa situación xurídica e a titularidade do inmoble, e poder garantir así a súa conservación e recuperación, xa sexa mediante adquisición, cesión, convenio coa propiedade ou calquera outra fórmula legalmente viable”.