Rueda lembrou en Monforte que Lugo foi na anterior convocatoria das Eleccións Xerais, en 2023, a provincia que brindou máis votos ao Partido Popular en toda España, e lanzou o reto de superar ese resultado o vindeiro día 29 de novembro, “a única maneira de lograr o cambio necesario para España nas urnas é votar con forza, non confiarse”.
O presidente do PPdeG lembrou como o cara a cara do pasado xoves entre Alberto Núñez Feijóo e Pedro Sánchez “ratificou que o candidato popular é o presidente que necesita España, despois de colocar ao candidato socialista ante o seu espello e darlle unha lección”. Ademais da súa mala xestión -incidiu-, “Sánchez preséntase ás urnas coa bagaxe daqueles dos que se rodeou neste tempo: Ábalos, Koldo, Leire Díez”.
E apelou ao voto ao PP, “porque ningunha outra garante que os galegos e galegas aproveiten a oportunidade que ofrecen estas eleccións: deixar atrás o sen sentido” de Sánchez e dar a benvida ao sentidiño de Feijóo.”
Pola súa banda, o cabeza de lista do Partido Popular ao Congreso pola provincia, Francisco Conde, reivindicou a xestión e o traballo dos representantes populares fronte á política de Sánchez e chamou á mobilización para repetir e mellorar o resultado de 2023, “Está en xogo o futuro das familias, dos autónomos e do medio rural”.
Conde reclamou mellores comunicacións para a Ribeira Sacra e apelou a concentrar os esforzos “no cambio necesario, co fin de impulsar esta comarca e os proxectos que o Goberno soterrou nun caixón, como a A-76 (Ponferrada-Monforte-Ourense) e a A-56 (Lugo-Ourense), o mantemento da N-120 e o impulso definitivo para que a Ribeira Sacra sexa declarada Patrimonio Mundial da Humanidade”.
O mitin en Monforte comezaría coas intervencións da portavoz popular monfortina e deputada autonómica, Katy Varela, e da candidata ao Senado e alcaldesa de Folgoso do Courel, Lola Castro.
O PP visita Chantada en día DE feira
O presidente do PPdeG, Alfonso Rueda, o candidato ao Congreso por Lugo, Francisco Conde, e o número un ao Senado, José Manuel Barreiro, así como doutros membros da candidatura e cargos políticos, visitaban este sábado os mercados da feira de Chantada onde quixeron coñecer as inquedanzas da veciñanza e aproveitaron para pedir máxima implicación e “non escatimar ningún esforzo no último sprint da campaña”. Desde Chantada Rueda insistiu en que, “É fundamental que todos aqueles descontentos cos últimos oito anos, con Pedro Sánchez á fronte do Goberno, escollan a papeleta do PP”.

Rueda, feira en Chantada campaña 2026 / PP provincial

