Darío Piñeiro López denuncia que “o único que fai polo municipio o voceiro do PP é poñer trabas para que os proxectos do Concello non saian adiante”. Neste senso, o rexedor socialista explicou que “todas as actuacións que poñemos en marcha dende o Goberno Municipal son denunciadas sempre polo señor Cubillas coa finalidade de retrasar as obras, prexudicando cos seus actos aos veciños de Láncara”.

Diante da acusación da oposición, de empezar as obras de construción da ponte de Santa María de Lama hai quince días como estratexia electoral, o alcalde deféndese argumentando que houbo que esperar máis dun ano polo permiso para poder actuar e nunca se dilatou o proceso para sacar rédito político. Engade, ademais, que ese tipo de estratexias son máis propias do ADN do PP e de esperar tamén do señor Cubillas se fose el o alcalde.

Piñeiro, sae o paso tamén de críticas respecto a outros temas relacionados coas obras públicas no Concello de Láncara. No que atinxe ao prezo da renovación da pasarela da Praia fluvial lembra que o prezo de licitación é de 27.000 euros e non de 40.000 como afirma Santiago Cubillas. E matiza que sendo previsible que baixe dese importe no proceso de adxudicación aínda se poderá renovar o alumeado público da pasarela co conseguinte aforro orzamentario.

Tamén se defende da acusación do PP local cando afirma que as melloras en vías municipais non incluían a limpeza das cunetas cando iso non é certo. Segundo afirma Darío Piñeiro, operarios da Deputación de Lugo traballaron neses labores e o Goberno Municipal mercou un camión é unha pala para complementar os traballos.

Para rematar, o rexedor lancarés destaca que grazas ás xestións do seu equipo de goberno o Concello de Láncara conta cun completo parque móbil composto por un camión de rego, un pisón, un tractor, un remolque, dúas desbrozadoras e unha pala mixta.