O Partido Popular monfortino intenta calmar as augas e, apurando os prazos, enderezar o rumbo presentando a tres coñecidos monfortinos que formarán parte do equipo popular para as eleccións municipais: Iván Vázquez, actual concelleiro, Roberto Eireos e Manuel Rodríguez Martínez.

Katherine Varela sinala que “trátase de tres persoas da miña confianza, comprometidas co Partido Popular e que me acompañarán no noso proxecto para Monforte de Lemos”. Así mesmo, engade que “son persoas con ganas de traballar na procura do mellor, tanto para o partido, como para o noso municipio, e síntome agradecida de contar con estes tres profesionais para afrontar o reto de recuperar a alcaldía xa que compartimos os mesmos obxectivos”.

A alcaldable popular explica tamén que nos vindeiros días darase a coñecer a candidatura completa e que están “centrados en presentar aos monfortinos un proxecto de futuro para a cidade” que acabe coa parálise na que se atopa co Goberno do PSOE.