O monfortino Roberto González inaugura a súa obra “Control” no Museo Provincial de Lugo que se pode visitar ata o vindeiro 30 de setembro. O acto estivo presidido por Pilar García Porto, Deputada de Cultura da Deputación de Lugo, e na que tamén estiveron a Concelleira de Cultura Carmen Basadre; o alcalde de Monforte, José Tomé Roca; a Coordinadora do proxecto, Encarna Lago e a Directora do Museo, Aurelia Balseiro García.

No Museo Provincial o tema a representar é a influencia (medos herdados/pegadas de ferro) dos gobernantes sobre a Historia. Na Torre de Xiá (Museo Fortaleza San Paio de Narla) resoan como “pedra dura” as pegadas do Poder sempre vixía. No Museo do Mar de Cervo, antiga escola, medítase sobre a Educación (as orlas uniforman), e no Museo Pazo de Tor de Monforte debátese sobre a influencia dos vellos credos. Acompañan a este proxecto os poemas e as obras de María José Fernández, Marica Campo, Olalla Cociña e Olga Novo que reflexionan sobre o devir de seres vixiados.

“Con este proxecto, o autor, que inclúe un cento de retratos a maioría de homes, transcende o valor estético da obra de arte e proponnos reflexionar sobre a imaxe como comunicación, como símbolo que representa as formas históricas de relación social, especialmente as de control desde as diferentes formas de poder”, sinalou Pilar García Porto.