O delegado territorial da Xunta en Lugo, José Manuel Balseiro, lembrou que os anteproxectos deste plan publicáronse o 31 de xaneiro do 2019 para sometelos a información pública, e nin o concello de Monforte nin ningún particular presentou alegación algunha para modificar a proposta da área territorial de Monforte.

No que respecta ás conexións entre Monforte e Lugo, increméntanse as expedicións ata oito servizos por sentido e día, entre as 6:35 horas e as 22:05 horas. Con Ourense mantéñense tres servizos por sentido e día durante todo o ano, incluídas as fins de semana.

Igualmente, mantéñense os servizos con Lugo e Santiago adaptando os horarios para cubrir as necesidades de traballadores e estudantes. Así Monforte e Santiago dispoñen de liña de luns a venres, con ida ás 7:50 horas e volta ás 15.00 horas. Ademais, os venres e vésperas de festivo hai outro servizo en horario de tarde durante o período lectivo, e os domingos durante todo o ano.