O presidente da Deputación de Lugo e alcalde de Monforte, José Tomé, inaugurou este venres no embarcadoiro de Ponte do Sil a tempada de rutas fluviais en catamarán pola Ribeira Sacra da institución provincial, que arrinca con máis de 500 reservas, das que 260 son só para esta ponte de San JXsé.

Segundo traslada a Deputación nun comunicado, Tomé reivindicou a importancia da aposta da institución provincial por este servizo público que contribúe a “dinamizar a economía” axudando á hostalaría, ao turismo e ao comercio local “nun momento crítico” para estes negocios polas restricións anti covid.

“Quixemos non só apostar un ano máis polas rutas fluviais en catamarán pola Ribeira Sacra, senón empezar antes que nas tempadas pasadas porque cremos que repercutirá positivamente no sector servizos, que tanto o necesita”, recalcou.

As rutas polo Canón do sil e Cabo do Mundo funcionarán ata finais de ano, “sempre adaptándose e cumprindo coas medidas de prevención do coronavirus que vaian adoptando as autoridades sanitarias en cada momento”.