Un hóspede dun hostal do concello lucense de Monforte de Lemos foi atopado falecido este sábado pola tarde, despois de que o persoal do establecemento solicitase axuda aos servizos de emerxencias para poder acceder á habitación.

Segundo fontes do 112 Galicia , sobre as 20,15 horas a central de emerxencias recibía unha chamada por parte do persoal do establecemento, situado na Praza Doutor Goyanes, indicando que un dos clientes non abría a porta do seu dormitorio e non podían acceder.

Con esta información, o 112 Galicia deu aviso aos servizos sanitarios e aos Bombeiros de Monforte de Lemos, que conseguiron acceder ao interior da habitación a través dunha xanela para, posteriormente, permitir a entrada dos profesionais sanitarios.

Así mesmo, ata o establecemento tamén se desprazou a Policía Local do municipio lucense.