Este sábado concedéronse as becas que a Deputación ofrece a pilotos lucenses de rally, cun valor total de 45.000 euros.

As becas van dende 1.364 euros ata 7.000 euros e con elas poderán sufragar gastos federativos da actividade competitiva, gastos de inscrición para competicións ou probas oficiais, gastos pola compra ou aluguer do vehículo de competición, gastos de transporte do vehículo e material de competición, así como gastos da adquisición de pneumáticos do vehículo.

11 profesionais lucenses son os beneficiados destas axudas. 5 profesionais do Concello de Lugo, 2 de Castroverde, 2 de Outeiro de Rei, 1 de Friol, e 1 de Sarria. A estas axudas puideron optar todos os interesados que participaron na modalidade de rally de asfalto, terra ou montaña na anualidade 2017.

A Deputación de Lugo achega máis de 130.000 euros para a promoción do automobilismo na provincia. Repartidos entre as axudas ós pilotos de rally, cursos de formación técnica e condución segura para 185 afeccionados e o apoio económico ás catro probas automobilísticas que se celebran na provincia: o Rally San Froilán, o Rally da Ulloa, a Subida a Chantada e a Subida á Pontenova.