Este venres, 1 de xaneiro, celebrouse no Auditorio Municipal de Chantada a II Mesa coloquio 8M, neste caso co título “Traballadoras Invisibles”, na que media ducia de mulleres, amas de casa, coidadoras, gandeiras, agricultoras, limpadoras, cociñeiras… comentaron as súas experiencias de vida.
Durante a fin de semana o Concello de Chantada tamén colaborou no XVIII Encontro Anual da Secretaría das Mulleres do Sindicato Lagrego Galego, que se celebrou na Galería Vilaseco Laboratorio Creativo de Chantada.
Para o venres, 8 de marzo, desde o CIM organízase a xincana, “Rastrexando a igualdade por Chantada”. A actividade que terá lugar na xornada do mañá contará coa participación do alumnado dos centros de ensino de Chantada, que percorrerán as rúas da vila resolvendo as distintas probas.
A lectura do manifesto do 8M terá lugar ás 12:00h na Praza do Cantón. A concelleira de Igualdade, Pamela Fernández, encargarase da lectura e convida a participar a todas as veciñas e veciños, “será un día importante coa nosa vuventude rastrexando a igualdade polas nosas rúas; xuntarnos todas/os despois no Cantón para a lectura do manifesto e dar mostra da importancia de traballar xuntas/os desde a educación para conseguir unha sociedade realmente igualitaria”.
Con esa intención de centrar a atención na educación desde a infancia e a xuventude, a programación do 8M complétase con dúas sesións de contacontos. A primeira o propio 8M ás 17:00h na Casa da Cultura con “Bolboretas”. Xa o mércores, 20 de marzo, a Casa da Cultura acollerá ás 17:00h “Elas” con Vero Rilo.
Tamén ao redor do 8M, desde mediados de febreiro, a rúa na que está ubicado o CIM chámase “Rúa 8 de marzo” como homenaxe á muller e en reivindicación da igualdade real de dereitos e deberes.
