Artistas internacionais, nacionais e locais daranse cita o próximo 25 e 26 de outubro en Sarria no festival underground actualmente máis consolidado en Galicia. O cartel abarca ampla variedade de estilos, desde Canadá chega Ghostwoman cun estilo pop-rock psicodélico e un encanto sonoro profundamente adictivo. Nudozurdo é unha das bandas máis rabiosamente persoais e íntegras que deu a música española independente nas últimas dúas décadas. Pop, kraut, rock e sons tropicais, definen á banda Can. Triángulo de Amor Bizarro únense ao festival para incluílo na súa xira XX20 na que conmemoran os seus 20 anos nos escenarios.
Atención Tsunami, Cora Yako, Bernal, O Mozo López e así ata 20 nomes de bandas e artistas daranse cita nos concertos que se desenvolverán na sala Litmar e na sede da sociedade La Unión, neste caso só o sábado e con acceso gratuíto. As entradas para a sala Litmar poden adquirirse na páxina web do festival, onde tamén se poden consultar os detalles do programa.
Na presentación participaron o delegado territorial, Javier Arias, así como Jose Castro, Diego García e Juan Padín en nome da organización. Arias destacou “o pulo que está a experimentar o Esmorga Fest nos circuítos de música independente”, confirmando para esta novena edición a algúns dos artistas de máis proxección do panorama nacional e internacional.
