O programa de eventos empezou días atrás coa feira de gando, un Campionato de Tute benéfico en favor da Asociación Española contra o Cangro e a Festa dos Maiores na que houbo un xantar popular con actuación e baile; pero o día propio da exaltación da tenreira é hoxe 1 de maio.

A partir das 11:00 h. a música empezará a soar cun pasarrúas a cargo da Asociación Ars Nova e a partir das 12:30 h. ofrecerase unha degustación de balde aos presentes de produtos do país: queixos, galiña de Mos, sidra ecolóxica, xamón, embutidos…

Ás 13:00 h. terá lugar unha ‘actuación vermú’ da cantante do Incio Lucía Pérez e acto seguido o pregón a cargo do Presidente da Audiencia Provincial de Lugo, José Antonio Varela Agrelo.

Chegada a hora de comer os/as que o desexen poden gozar do xantar dedicado á protagonista da feira, a tenreira. O menú costa 14 euros.

Xa pola tarde, farase entrega do premio do concurso de gando e o sorteo dunha tenreira que foi doada pola granxa Gayoso Castro da Deputación de Lugo e ás 17:30 h. concerto de Lucía Pérez.