Dada a afluencia cada vez maior de visitantes estranxeiros na zona da Ribeira Sacra, a Fundación Belarmino Fernández Iglesias considera que o alumnado do Centro debe mellorar as súas competencias, non só en idiomas, senón tamén deixarse influír culinariamente por outras culturas. Por iso o Centro solicitou para os vindeiros dous cursos académicos o Programa Erasmus+, que se lle vén de conceder.

Para poder solicitar este Programa Erasmus+, a Escola entrou en contacto con empresas italianas e cun centro de formación profesional ubicado na cidade de Salo en Finlandia. Este xoves visitaron a Escola representantes do centro finlandés. O ‘Salon seudun koulutuskuntayhtymä’ conta nas súas aulas con máis de tres mil alumnos e alumnas. No Centro impártense ensinanzas de restaurante e catering, turismo, informática, comercio, etc.

Ademais da Escola de Hostalería, os visitantes tiveron a oportunidade de coñecer outros recursos do concello de Sober, como a olería de Gundivós e os restaurantes de ex-alumnos da Escola de Hostalería nos que o alumnado finlandés podería facer os seus módulos de prácticas.