Para garantir a igualdade todos e todas temos responsabilidade, e o aspecto educacional e preventivo xoga un papel moi importante. No Concello de  Sarria sábeno e programan actividades para a concienciación conxuntamente cos centros educativos da vila.

Insisten na importancia de unir esforzos e traballar conxuntamente co obxectivo común de acabar coa violencia de xénero, e entenden que a prevención é unha ferramenta fundamental.

Co financiamento do Ministerio da Presidencia, Relacións coas Cortes e Igualdade, a través da Secretaría de Estado de Igualdade, dende o mes de maio estanse a desenvolver obradoiros lúdico-educativos co alumnado dos centros educativos da contorna, dirixidos á prevención e á sensibilización sobre a violencia de xénero.

Este mércores día 12 de xuño, as actividades realizaranse no CEIP Antonio Fernández López de Oural, o xoves 13 no CEIP Frei Luis de Granada en Sarria, o luns 17 e martes 18 no Colexio da Merced, tamén de Sarria, e o 19 e 20 de xuño no CPI Ramón Piñeiro de Láncara.

A finalidade destes obradoiros é involucrar ao alumnado na importancia dos valores igualitarios, libres de prexuízos e de estereotipos sexistas, no respecto ás diferenzas individuais de cada persoa, na reflexión sobre a existencia de violencia nos seus modos de relacionarse e no coñecemento das consecuencias desas relación tóxicas.