Beatriz Vila, responsable da zona sur da APEHL, Asociación Provincial de Empresarios de Hostalería e Turismo de Lugo, impulsa cada certo tempo actividades de formación e de dinamización do sector como as xa coñecidas xornadas gastronómicas do “Estase cocendo” ou o “Cume tapas”.
Nesta ocasión, para o vindeiro martes 30 de xullo, desenvolverá unha xornada gastro-cultural bautizada co nome de “Tapalandia” que está enfocada a nenos e nenas de 5 a 12 anos. Ese día, en horario de 10:00 a 19:30 h., as instalacións da Delegación Zona Sur de APEHL, na Rúa Zapaterías s/n de Monforte de Lemos (Torreón do cárcere vello), serán o escenario deste particular ‘Master Chef junior’ centrado no mundo do tapeo.
Os nenos e nenas elaborarán e degustarán diferentes tapas, bebidas e sobremesas da man do chef do Restaurante O Grelo, Martín Mantilla. A xornada inclúe diversas actividades e terá un custe de 30 euros por pequeno/a. No caso de participar familiares de socios da entidade organizadora o prezo será de 20 euros e se veñen dous da mesma familia aplícase un pequeno desconto.
O custe mencionado, ademais da formación especializada e as actividades que se realizan, inclúe material, vestimenta de cociña e diploma de participación. Todos os interesados e interesadas en participar nesta nova iniciativa poden contactar no teléfono 982.412.050 para inscribirse antes do día 26 de xullo.
