Setembro arrinca na Biblioteca do Saviñao coa actividade =Igual con Dani Viéitez e Iria Iglesias, autores da serie do Raposo Rufo e de Amanita e Pilonga que falarán do seu traballo como ilustradores e das tarefas na casa que reparten equitativamente. A cita será o venres 6 de setembro ás 12.00 h., neste contacontos relacionado coa igualdade, coñeceranse conceptos coma a empatía, o respecto, o sexismo e o feminismo; rematarase cun obradoiro.
As seguintes citas serán o 13 de setembro con Carmen Domech e A carteira de Augasclaras; o 20 de setembro en horario de tarde, Tarabelos propón Rosalía, todos por igual. Tamén en horario de tarde, o día 27, Eduvía, xestión cultural e lecer protagonizará a actividade Contamos en igualdade.
Xa nos venres de outubro as citas será pola tarde. O día 4 de outubro Menos dá unha pedra ofrecerá A escena verbas!, o día 11 Fámita Fernández propón Contos de sempre para xente dagora; o día 18 Antía Yáñez ofrece Rescate na biblioteca e as actividades de concienciación en igualdade rematarán nesta mesma xornada pola noite con Sole Felloza e o espectáculo Bolboretas.
As actividades deste ciclo foron seleccionadas dos catálogos de dinamización en bibliotecas Ler conta moito (da Consellería de Cultura e Turismo cofinanciadas co Concello do Saviñao) e Ler conta moito de igualdade (Consellería de Cultura e Turismo dentro do Pacto de Estado contra a Violencia de xénero). As 8 actividades seleccionadas diríxense á infancia, xuventude e público familiar.
