A actividade =Igual con Dani Viéitez e Iria Iglesias, autores da serie do Raposo Rufo e de Amanita e Pilonga e veciños de Pantón, foi a primeira das programadas para estes meses na Biblioteca Municipal do Saviñao co obxectivo de concienciar sobre igualdade.
Na devandita actividade, que tivo lugar este pasado venres, Dani e Iria falaron do seu traballo como ilustradores, das tarefas na casa que reparten equitativamente e ofreceron un conta contos relacionado coa igualdade, dando a coñecer conceptos como a empatía, o respecto, o sexismo e o feminismo.
As personaxes protagonistas da historia descubrían que, independentemente de que tiveran 2 ou 3 anteniñas, podían vestir como querían ou levar as cores que lles gustaran, xogar ao que máis lles apetecera e que estaba ben ter gustos diferentes.
A acción rematouse cun obradoiro de ilustración no que se tiñan que debuxar facendo o que máis lles gustara, independentemente de que se dixera que iso é “cousa de nenos” ou “cousa de nenas”.
A vindeira actividade, que chegará o venres 13 ás 12:00 h., será impartida por Carmen Domech e levará por título “A carteira de Augasclaras”.
Todas as actividades están enmarcadas no Ciclo Ler Conta Moito, que impulsa a Xunta de Galicia a través da Rede de Bibliotecas de Galicia, e que está cofinanciada polo Concello do Saviñao.
