Este venres 27 de setembro ás 18:00 h., a Biblioteca Pública Municipal do Saviñao continúa co Ciclo de actividades de Concienciación sobre a Igualdade e presenta Contamos en igualdade, unha sesión de conta contos que pretende rachar cos estereotipos dos roles tradicionais asignados aos personaxes dos contos en función do seu xénero, idade, etnia ou mesmo condición social, cultural ou funcional.
Esta actividade está enfocada a público a partir de 5 anos, será realizada por profesionais do proxecto educativo Eduvia e está enmarcada no programa Ler conta moito de igualdade, financiado pola Consellería de Cultura e o Pacto de Estado contra a Violencia de Xénero.
Nocións básicas para o aproveitamento do souto
E xa poñéndonos no luns, 30 de setembro, o Concello do Saviñao organiza unha sesión formativa sobre o aproveitamento sostible do souto que impartirá persoal a IXP Castaña de Galicia. Levarase a cabo no Auditorio do concello entre as 10:00 e as 14:00 h. sendo a asistencia de balde para os/as interesados/as.
Colaboran na xornada divulgativa a Xunta de Galicia, a Axencia Galega de Calidade Alimentaria -AGACAL-, o Ministerio de Agricultura, Pesca e Alimentación e o Fondo Europeo de Desenvolvemento Rural: Europa inviste no rural.
