Os Orzamentos da Xunta para o ano 2020 traerán consigo unha mellora da Tarxeta Benvida que beneficiará de xeito concreto aos concellos do rural de menos de 5.000 habitantes. Así o trasladou a deputada autonómica Raquel Arias, nunha visita ao Punto de Atención á Infancia (PAI) do Concello do Incio, na que estivo acompañada do alcalde, Héctor Corujo, e onde explicou que “as familias que vivan nestes concellos percibirán un incremento do 25% na Tarxeta Benvida, aquela que a Xunta lles concede cando son pais”.
Con esta medida de impulso á natalidade acordada polo Goberno galego, os pais e nais percibirán 1.500 euros polo 1º e 2º fillo e 3.000 euros polo 3º. Os concellos beneficiados por esta mellora nas Comarcas de Lemos, Quiroga, Chantada e Sarria son todos; un total de 16 agás as cabeceiras de comarca que pasan dos 5.000 habitantes (Monforte, Chantada e Sarria).
A maiores, as familias numerosas que teñan un terceiro fillo ou filla (con rendas medias e baixas) recibirán 2.400 euros ao ano dende o seu nacemento ata que cumpran os 3 anos con independencia do lugar no que residan. En concreto, o Goberno galego destina 8,7 millóns de euros nas contas de 2020 para o reforzo da Tarxeta Benvida, un 38% máis que no ano 2019.
En máis de tres anos a Xunta ten concedido máis de 50.000 Tarxetas Benvida, o que supón máis de 50 millóns de euros de investimento desde a súa implantación no 2016.
6.000 TARXETAS BENVIDA
Nas Comarcas de Monforte, Quiroga, Chantada e Sarria a Tarxeta Benvida beneficiou neste 2019 a 1.059 nacementos (dato provisional á espera de que remate o ano). En case catro anos a cifra ascende a preto de 6.000 Tarxetas Benvida nestas comarcas. No caso concreto do Incio, outorgáronse 18 Tarxetas Benvida no mesmo período.
A Tarxeta Benvida supón, agás nos supostos xa especificados, unha axuda directa de 1.200 euros durante o primeiro ano de vida do bebé para a compra de alimentos infantís, cueiros, roupa, berces e produtos de hixiene, farmacéuticos e tamén ópticos. Ademais, desde o ano 2017, a axuda estendeuse ata o terceiro ano de vida da nena ou neno para aquelas familias cunha renda igual ou inferior aos 22.000 euros. A axuda solicítase xa durante o embarazo.
O PAI DO INCIO
O Punto de Atención á Infancia do Incio dispón de 20 prazas para nenos de 3 meses a 3 anos. Na actualidade están cubertas 8 prazas, quedan vacantes 12 e o prazo de matrícula está aberto ata que se cubra a totalidade de prazas. Non é requisito imprescindible estar empadroado ou residir no Concello de O Incio para acceder a este servizo, aínda que teñen prioridade no acceso os nenos e nenas empadroados no municipio.
O horario actual de funcionamento do PAI é de 08:30 a 15:30 horas todos os días agás os sábados, domingos e festivos. No mes de agosto o centro permanece pechado por vacacións do persoal. As instalacións son amplas, con luz natural (todas as dependencias dan ao exterior) e está dotado de zona de xogos exterior.
