O traballo dos voluntarios ten como principal finalidade a relaxación e socialización dos cadelos que se atopan no refuxio de animais municipal, polo que os paseos serán a parte máis importante do seu cometido.

Este proxecto de Voluntarios Caninos de Quiroga nace coa finalidade de coidar máis axeitadamente aos cans do refuxio de animais. O programa, baixo a supervisión da xefatura do GES, mantén aberto o protocolo para que todas aquelas persoas que queiran participar o poidan facer en calquera momento, asinando o acordo de incorporación no grupo de voluntarios de coidado destes cans.

As persoas voluntarias comprometeranse a acudir ao refuxio de animais cunha periodicidade mínima quincenal, pasear ao cadelo que lle sexa asignado durante un tempo medio de media hora. Os cadelos levaranse con correa e cumprindo sempre as normas para o paseo de animais pola rúa. Os voluntarios, que poderán cesar nesta actividade cando o desexen, deberán cumprir un período de proba de tres meses no que se avaliará a idoneidade para o traballo.

E o refuxio de animais de Quiroga busca persoas que se fagan cargo dos cadelos de diferentes razas, que se atopan nas súas instalacións, algúns deles aínda cachorros. Ademais dos voluntarios para a atención no centro, búscanse voluntarios e familias para o acollemento destes animais

Os cans sairán das instalacións con todo pagado: o microchip obrigatorio, a desparasitación e as vacinas necesarias. Ademais o concello entregaralle á persoa que se faga cargo de cada animal a comida precisa para alimentalo durante un ano.