A Deputación de Lugo reclamoulle á Xunta de Galicia, a instancia do Grupo Socialista, a reapertura do consultorio sanitario de Oural, en Sarria. Deste xeito, a moción insta á Xunta a iniciar os trámites para reabrir o consultorio sanitario que o Goberno de Feijóo pechou no ano 2011.
“Os veciños e veciñas da parroquia de Oural son un claro exemplo do desmantelamento da sanidade pública por parte da Xunta, a pesar de estar obrigada a ofrecer a todos os galegos que e galegas unha sanidade pública de calidade e eficaz”, denunciou o deputado de Innovación e Participación Cidadá, Pablo Rivera Capón.
Este servizo daba asistencia sanitaria a unhas 1.200 persoas, residentes non só en Oural, senón nun total de 8 parroquias próximas. A supresión do consultorio obriga aos veciños e veciñas a viaxar máis de 9 quilómetros para recibir atención sanitaria no Centro de Saúde de Sarria, “situación que se agrava pois tampouco dispoñen dun transporte público, tralos recortes no traxecto Monforte-Lugo, que permita este traslado con relativa facilidade e frecuencia suficiente”, critica o socialista.
Máis de 1.000 persoas reclámanlle á Xunta que reabra o consultorio e asinaron unha petición para que Ourol volva ter servizo médico.
