O roqueiro navarro chegará a Pantón presentando o seu novo traballo composto por 3 discos. O que fora cantante e baixista do mítico grupo, Barricada, chega na súa última xira dende que comezou o pasado novembro. A estas alturas do ano, o concerto de Trece Roeis é o único concerto gratuíto que ten confirmado en toda Galicia. Ofrecerá unha actuación na que haberá sitio para os seus grandes clásicos, pero tamén para novas sonoridades e para a literatura, a actualidade, o amor e o compromiso.

Guezos é unha banda de rock-pop-folk ourensá, cuxas composicións son moi abertas a calquera estilo, valorando moito as melodías e as harmonías propias do folk e mesturándoas coa potencia do rock. A voz e a guitarra de Zeltia e o bodhran de Migui Carballido adentrarán ao público nunha viaxe onde o folk-rock e o blues se mesturan con outros momentos máis acústicos e tribais. Por último a banda de folk alternativo Rebezo, voltará de novo a Pantón cun novo disco baixo o brazo, despois de gañar a Batalla de grupos Trece Roeis 2019.

II Batalla de Grupos Trece Roeis

Este domingo, 23 de febreiro, abríase o prazo de inscricións ata o 23 de Abril para a II Batalla de Grupos Trece Roeis que se celebrará o 11 de Xullo. O grupo gañador será un dos que poidan compartir escenario cos catro grupos anunciados. Toda a información e as bases xa están dispoñibles na páxina www.treceroeisfest.com