Como pasou, por exemplo na Mariña, coa crise de Alcoa, pasou na Ribeira Sacra coa candidatura a Patrimonio da Humanidade; chega o COVID-19 e arrasa con todo para levarse todo o protagonismo. Pero a vida segue.
Os destinos para viaxeiros e turistas agora mesmo non existen, mellor dito, si existen, pero non como destinos porque non se pode ir a eles. Chegou o COVID-19 antes que a primavera e a Semana Santa, e todos na casa. O inicio da tempada retrásase e custará arrincar no regreso a algo parecido ao que había. O volver á normalidade, moita xente xa non o imaxina.
Para trasladar a Ribeira Sacra ás casas, o Consorcio de Turismo da Ribeira Sacra ten en marcha nas redes #EnjoyRibeiraSacra, proposta para afondar na riqueza patrimonial e natural deste territorio. E Ribeira Sacra tamén se pode desfrutar en vídeo co documental promocional do Consorcio de Turismo, Cando foi a última vez que che contaron un conto?
Ribeira Sacra ten paralizada hostalería, turismo e comercio, segue traballando o sector primario. “A viña non espera, hai que seguila cultivando e non podemos parar, o tema da adega témolo totalmente parado”, explican os adegueiros.
A quen lle vendes o viño agora?
Na D.O. Ribeira Sacra desenvólvese o traballo imprescindible para que as empresas poidan funcionar. Os traballadores túrnanse, para as citas presenciais dase cita e mantense a recollida de mostras e as catas, tomándose as medidas para non concentrar xente e atendendo a todos os requerimentos oficiais. “Hai que manter uns mínimos para que a economía siga funcionando. Ao sector do viño paralízaselle a economía durante este tempo, pero non somos un produto perecedoiro,” sinala o Presidente do Consello Regulador da D.O. Ribeira Sacra.
Aténdese a viña, pero as adegas están paradas e ven ralentizadas as súas vendas ao estar as canles de restauración paradas e con certa parálise na alimentación. Algún distribuidor xa avisou “que pecha e non volverá abrir”, noutros casos ao non poder vender, o distribuidor pide que non se lle cobren agora as partidas. “Todo está parado, tardará tempo en arrincar de novo”, din as adegas.
