Confecciones Elper e o director do colexio de Escairón, Pablo Blanco Quiroga, doan, respectivamente, ao Concello mascarillas e pantallas protectoras para combater o coronavirus. O alcalde do municipio, Carlos Armesto, agradece publicamente esta solidariedade altruista, “demostrándose a profunda xenerosidade dos nosos veciños”.
Ante a gravidade da situación que atravesa todo o país, o pasado venres pasado, e sabendo que o centro educativo conta con impresoras 3D, Armesto púxose se en contacto co directivo do centro para contemplar a posiblidade de fabricar as pantallas protectoras. Pablo Blanco aceptou xenerosamente a proposta do rexedor e este luns xa lle fixo á entidade local a primeira entrega destes sistemas de protección. As pantallas xa foron repartidas aos profesionais do centro médico e da residencia pública do Saviñao. Entregaranse máis pantallar aos traballadores de axuda a domicilio.
Confecciones Elper, empresa afincada en Escairón, puxo a disposición do Concello un total de 100 mascarillas “e segue a traballar para poder asistir a toda a xente que as precise”, tal e como explica o máximo mandatario municipal. Estes elementos de protección súmanse aos que xa foron concedidos pola Xunta de Galicia a semana pasada -1.000 luvas e 114 mascarillas- e que foron distribuídos, principalmente, ás empregadas do servizo de Axuda a Domicilio.
Medidas medioambientais e sociais
No marco das medidas emprendidas polo Concello, dende o punto de vista medioambiental, Armesto tamén quere por en valor a colaboración da Cooperativa Lemos. Grazas á cesión dunha máquina desinfección por parte desta entidade, a administración local desinfectou todas as rúas do municipio, os edificios públicos, así como as fachadas dos establecementos que teñen que permanecer abertos. Neste senso, pide aos veciños deixen as tapas dos colectores de lixo abertas, co fin de que estes non se convirtan nun foco de contaxio por coronavirus. Estes tamén son desinfectados en cada recollida.
En materia social, lembrar que a entidade local continúa co reparto de alimentos e medicinas aos domicilios de todas as persoas que así o están a solicitar, chamando ao número 982.452.061 ou a través dos Servizos Sociais.
