O alcalde de Sarria, Claudio Garrido, confirmou a Europa Press que “todas as persoas atópanse asintomáticas polo momento”. O rexedor afirma que “desde a Xunta de Galicia, titular do centro, xa se están tomando as medidas oportunas para controlar o brote”.

Os traballadores do centro esixen, tras coñecerse estes casos positivos, a realización dun maior número de probas de coronavirus para coñecer o alcance da infección. Garrido afirmou que na xornada deste martes “producíronse labores de desinfección no CAPD”, pero indicou que descoñece como está a situación no interior do centro.

No resto de centros de atención a persoas con discapacidade no sur da provincia, mantense o caso detectado na Vivenda Tutelada Agora en Monforte. En Galicia, nestes centros, hai diagnosticados de COVID19, 37 usuarios e 31 traballadores.

Nas residencias de anciáns, o número de casos detectados a nivel galego é de 393 usarios afectados e 128 traballadores. Na zona sur cóntase con 4 casos activos na DomusVi Monforte (dous traballadores e dous usuarios), 2 casos na de Chantada (1 usuario e 1 traballador). Na contorna contaríase tamén coa residencia de Castro Cadelas na que hai 9 persoas persoas con COVID19 -6 internos e 3 traballadores- e 2 xa faleceron.