O Hospital comarcal de Monforte converteuse na tarde deste mércores, 15 de abril, no primeiro hospital de Galicia sen ningún paciente hospitalizado por Covid19. Durante a mañá, Sanidade informaba de que este centro contaba con 3 hospitalizados e pola tarde déuselles a alta.

A comarca de Lemos conta con varias persoas diagnosticadas de Covid19, que fan confinamento na casa, pero no Hospital Comarcal esta tarde non había ningún paciente hospitalizado por Covid19. A situación pode variar, pero polo momento os casos detectados non presentan complicacións e están nos seus fogares.

Ás 19.00 deste mércores, unha traballadora do Hospital Comarcal de Monforte, aseguraba á outra banda do teléfono, “Nestes momentos estamos tranquilos, non temos hospitalizados. A situación tamén pode cambiar en calquera momento porque na comarca hai pacientes positivos, pero polo momento non presentan complicacións e están nas súas casas. Estase pendente do resultado de varias probas.”

Ao feito de que nestes momentos non haxa hospitalizados engádese que o número de probas a domicilio e no Covidcar do hospital tamén están descendendo porque cada vez hai menos xente con sintomatoloxía, “Descenderon moito o número de probas de automóviles e de domicilios e estamos centrándonos nos centros sanitarios”.

Desde o Hospital Comarcal de Monforte fanse tamén os test de detección do Covid19 nas residencias. Persoal deste centro fixo as probas da Domusvi Chantada, da Domusvi Monforte e da residencia do Malecón, na cidade do Cabe. En Monforte faltaría o Fogar San José por facer as probas, mañá achéganse ao xeriátrico de Quiroga.

“Orgullosos de traballar cos compañeiros porque se medraron ante a adversidade”

Nestes momentos hai estabilidade, pero o traballo non para. O despliegue para a preparación dos test nas residencias é importante. Os procedementos foron axilizándose co paso dos días e nesta comarca respírase un pouco, despois do vivido e do que pode quedar; hoxe o día para o persoal sanitario era de satisfacción “Unha satisfacción impresionante a nivel profesional e persoal de cada traballador. O teu traballo serviu para algo, puideches poñer o teu graniño de área nun momento que é fundamental. Orgullosos de traballar cos compañeiros porque se medraron ante a adversidade. Son uns valentes que aportaron o que puideron para evitar contaxios, para que as cousas funcionaran mellor, para achegarse aos pacientes coa humanidade que os hai que tratar.”

O persoal sanitario de Monforte lembra que todo o persoal do centro, enfermería, auxiliares de enfermería, celadores, persoal de limpeza,…estaban traballando a mínimos antes da pandemia e nesa situación enfrontáronse á crise, cunha precariedade de efectivos e medios que se solventou, principalmente, co seu esforzo neste tempo. Destacan “A boa vontade das xerencias e das administracións, ninguén a pon en dúbida. O problema está na precariedade do sistema público de saúde, non  pode ser que os profesionais esteamos sufrindo a uns niveis incluso sicolóxicos. Ter que enfrontarnos a isto con esta precaridade, sen unhas liñas de funcionamento claras, foi moi complicado e moi difícil.”

Nun día feliz no Hospital Comarcal de Monforte lémbranse de quen saben o están pasando mal “Aquí parece que pasou un pouco de lado a pandemia e puidemos sobrelevalo, de momento; pero en Ourense ou no Chuac os compañeiros estano pasando mal.”

A provincia conta con 589 casos activos, un menos ca onte, deles 9 están na UCI. 39 persoas seguen hospitalizadas entre Lugo e a Mariña e 538 atópanse nos seus domicilios. Na provincia lévanse producido 21 falecementos.