A Deputación adapta o Plan Único 2020 abrindo unha nova liña de gasto para que os concellos poidan utilizar a metade dos fondos que perciben, a medidas sociais ante o coronavirus. Así, os municipios da Zona Sur recibirán preto de 6M€ do Plan Único, dos que poderán destinar máis de 2,9M€ a paliar os efectos do coronavirus.
Adiántaselle, ademais, aos concellos que teñen delegada na institución a xestión de impostos, o importe correspondente aos pagos mensuais de abril, maio e xuño, o que supón unha inxección directa de preto doutros 2,9M€ nos concellos do sur da provincia, que ven así mellorada a súa liquidez para asumir gastos imprevistos, o pago a empresas e provedores ou as medidas que consideren oportunas.
O presidente, Tomé Roca, manifesta que estes fondos “contribuirán, non só a cubrir servizos sociais e velar pola calidade de vida e o benestar da cidadanía, senón tamén e de maneira moi importante á reactivación da economía e do emprego unha vez rematado o estado de alarma. Esta inxección económica repercutirá, no caso de investimentos ao abeiro do Plan Único, na contratación sobre todo de pequenas e medianas empresas, moitas de ámbito local, o que axudará a recuperar o pulso das economías locais”.
Outra das novidades do Plan Único 2020 é a flexibilización dos prazos para que os concellos teñan a marxe suficiente, amplíase un mes tanto o prazo de contratación, pasando do 30 de setembro ao 30 de outubro, como o prazo para adxudicar os investimentos, quedando ata o 30 de novembro.
