A Alcaldesa de Castro Caldelas, Sara Inés, en colaboración coa Garda Civil e Protección Civil, dedicaron o pasado sábado 2 de maio a visitar os oitenta pequenos e pequenas do concello.

O obxecto desta visita a domicilio era agasallalos polo comportamento responsable durante o estado de alarma, e para iso percorreron o núcleo urbano e todas as parroquias con música ao tempo que entregaban a cada un deles un diploma, un presente e lambetadas.

Segundo palabras da rexidora local, “foi emocionante recibir o seu agarimo, a súa ilusión, os seus debuxos e o seu sentir”. A experiencia, en definitiva, resultou emotiva para os pequenos e pequenas pero tamén para as familias e para os que repartiron os agasallos.