Este xoves, 7 de maio, a provincia de Lugo conta con 170 casos activos de coronavirus, 4 máis ca onte, dos que 6 están na UCI, 1 máis ca onte; todos eles no HULA. No Hospital da Mariña mantéñense 2 pacientes na UCI, pero deron negativo na Covid19 nas probas que se lles veñen de facer.
Dúas persoas están en hospitalización, igual ca onte; 1 na Mariña e outra no HULA. O Hospital Comarcal de Monforte mantense desde o día 15 de abril sen hospitalizados por Covid19.
162 persoas están nos seus domicilios con diagnóstico positivo, 3 máis ca onte. Desde o comezo da crise, na provincia lévanse producido 689 altas e onte aumentaba o número de falecementos a 27, un home de 69 anos que permanecía baixo atención hospitalaria a domicilio.
Os datos correspondentes á zona sur da provincia nas residencias de maiores e centros de atención a persoas con discapacidade mantéñense estables; despois de que onte se comunicara a curación dos 8 infectados na residencia de Taboada.
En Galicia o número de vítimas do coronavirus relacionadas con centros residenciais é de 266, o que supón un 45,4 por cento do total de mortes . Ás persoas falecidas en residencias de maiores hai que sumar outras 454 en atención hospitalaria: 122 na área sanitaria da Coruña, 93 na área de Ourense, 90 na área de Vigo, 78 na área de Santiago, 29 na área de Ferrol, 26 na de Lugo (dúas das persoas, en atención domiciliaria), e 16 en hospitais da área de Pontevedra.
