A residencia de maiores O Meu Fogar, do concello de Taboada, detectaba un brote de coronavirus nas súas instalacións con oito infectados o día 22 de abril. Nesta semana véñense de facer de novo as probas e os 5 usuarios e 3 traballadores da residencia de maiores de Taboada deron negativo na Covid19; quedando o centro da Fundación San Rosendo libre de coronavirus. Todos os test rápidos que se teñen feito ata a data entre a poboación deste concello están dando negativo en coronavirus.
No resto de residencias de anciáns da zona sur os casos activos mantéñense estables, se ben deuse unha nova curación nun traballador da residencia de Castro Caldelas, onde seguen 4 traballadores infectados.
Nos centros de atención a persoas con discapacidade comunícase tamén a curación dun usuario da Domusvi de Bóveda. Este centro conta aínda con 12 usuarios infectados e 7 traballadores.
Por outra banda, o número de casos activos de coronavirus en Galicia baixou en 11 nas últimas horas, ata situarse en 2.808, o que supón un descenso do 0,39 por cento, segundo os datos trasladados este mércores pola Consellería de Sanidade.
As mesmas fontes comunicaron que, do total de casos, 781 correspóndense coa área sanitaria de Vigo, 658 coa área da Coruña, 462 correspóndense coa área de Ourense, 455 son da área de Santiago, 166 da área de Lugo, 160 da área de Pontevedra e 126 da área de Ferrol.
Por outra banda, tamén se notificou un incremento no número de pacientes curados, que pasan de 6.561 a 6.802 (241 persoas máis), así como unha baixada no número de pacientes ingresados nas Unidades de Coidados Intensivos (UCI), que se reducen en 7, ata os 30.
