Este domingo, 10 de maio, a provincia de Lugo conta con 161 casos activos de coronavirus, 5 menos ca onte, dos que 4 están na UCI, igual ca onte; todos eles no HULA. No Hospital da Mariña mantéñense 2 pacientes na UCI, que xa son negativos na Covid19.
1 persoa segue en hospitalización na provincia, 1 menos ca onte. A persoa hospitalizada está no HULA. O Hospital Comarcal de Monforte mantense desde o día 15 de abril sen hospitalizados por Covid19.
156 persoas están nos seus domicilios con diagnóstico positivo, 4 menos ca onte. Desde o comezo da crise, na provincia lévanse producido 715 altas e mantéñense os falecementos en 27.
Os datos correspondentes á zona sur da provincia nos centros de atención a persoas con discapacidade deixan dúas novas curacións en usuarios da DomusVi Bóveda, que aínda así segue con 10 usuarios infectados e 5 traballadores. Nas residencias de anciáns da zona sur da provincia os casos activos seguen estables.
O número de casos activos de coronavirus baixa en Galicia ata os 2.703 este domingo, con 55 menos que o sábado, xa que as 122 altas contabilizadas superaron o número dos contaxios detectados nesta última xornada.
