O voceiro municipal, Efrén Castro, sinala que “o sistema xudicial ten que afrontar as mudanzas necesarias para garantir o acompañamento e asesoramento das mulleres vítimas de violencia sexual xa que”, dixo, “a falta formación e de medios materiais e humanos dificulta que reciban o apoio necesario”.
Castro incidiu no caracter estrutural da violencia de xénero que, dixo, “ten a súa raíz nunha sociedade machista que aínda sostén estereotipos e roles que menoscaban os dereitos e liberdades das mulleres polo feito de selo. As mulleres teñen que ser libres para saír á rúa, non valentes, non podemos reproducir mensaxes que inciden no medo e na submisión”, aclarou.
Nesa liña, o concelleiro sarriao apuntou que “a educación en igualdade é a mellor ferramenta para erradicar esta problemática pero, no camiño, as administracións e o sistema xudicial teñen que ser capaces de proporcionar ás vitimas a protección e o apoio psicolóxico e social que requiren e poñer en marcha todos as medidas de prevención dispoñibles”.
O BNG, que este domingo participou na marcha organizada por Mulleres de Raíz nas Aceas, sumarase tamén á mobilización convocada polo colectivo para este mércores 10 de xuño ás 20:00 horas.
