A Xunta de Goberno da Deputación aprobou a licitación da obra de mellora da estrada provincial LU-P-4102 que une Ferreira de Pantón e Escairón. O orzamento base de licitación supera os 165.000 euros. Unha vez iniciadas as obras, o prazo máximo de execución é de 6 meses.
Os traballos consistirán na limpeza de cunetas, a mellora do firme con aglomerado en quente e o incremento da seguridade viaria coa renovación da sinalización horizontal e vertical. Estas actuacións completan outras obras que a Deputación fixo recentemente entre o núcleo de Escairón e o de Currelos con conexión tamén cara Paradela.
O mandatario provincial, José Tomé, destaca que “para este Goberno, a mellora das comunicacións viarias dos veciños e veciñas da provincia é unha prioridade. Coa rede viaria provincial máis extensa de España e nunha realidade rural como é a nosa, son un piar fundamental para garantir o benestar e o desenvolvemento económico”.
