O Consorcio de Turismo da Ribeira Sacra ten xa operativa a web de reserva mediante cita previa para a visita de monumentos e outros recursos de interese turístico de Ribeira Sacra.
Aseguran desde o Consorcio que se comezou a traballar nesta ferramenta durante o confinamento, “A cita previa e o control de aforo eran xa obxectivos que estaban sobre a mesa e que se consideraban necesarios no marco do plan de xestión da Paisaxe Cultural de Ribeira Sacra.”
Con esta iniciativa o Consorcio pretende poñer a disposición dos xestores dos recursos turísticos os sistemas necesarios e asumibles que permitan aos concellos tomar medidas relacionadas coa capacidade de carga dos puntos máis visitados e coa instalación de mecanismos para garantir a seguridade dos usuarios durante as visitas.
Pode procederse coa reserva e a compra de entradas para visitas a realizar a partires do 8 de xullo (inclusive) nos seguintes puntos de interese:
- Mosteiro de Santa Cristina (Parada de Sil)
- Mosteiro de Santa Mª de Montederramo
- Mosteiro de Santa Mª de Xunqueira de Espadanedo
- Museo Alfarería de Niñodaguia (Xunqueira de Espadanedo)
A plataforma está configurada nos tres idiomas nos que habitualmente desenvolvemos os soportes de información: galego, castelán e inglés. As entradas xenéranse en formato dixital con códigos QR asociados e han de ser presetandas no acceso ao recurso. Aos concellos adheridos foilles instalada unha App coa que ler os códgos QR e comprobar a veracidade das entradas. Como a cobertura de datos e telefónica en determinados puntos é bastante limitada, a programación do sistema está pensada para que esa lectura de códigos se realice sen necesidade de conexión.
É previsible que nos vindeiros días se vaian sumando máis recursos. A ferramenta está a disposición dos 21 concellos que forman parte do Consorcio de Turismo e poden engadir cantos monumentos e servizos consideren. O sistema está financiado polo Consorcio de Turismo no marco do convenio de colaboración coa Axencia Turismo de Galicia para o ano 2020.
