O Concello do Saviñao iniciou esta semana a substitución das varandas da Praia da Cova. 200 metros con madeira tratada cos que se contribúe, engade o alcalde, Carlos Armesto, “a por en valor un espazo que é un dos máis emblemáticos da Ribeira Sacra”.

Deste xeito, dende o goberno local melloran o contorno desta área fluvial, situada na beira do río Miño, e que, na época estival, se converte nun dos reclamos de visitantes e de todas as persoas que durante estas semanas regresan á zona para desfrutar das súas vacacións de verán. 

“Sen ningún tipo de dúbida,  con esta actuación, tamén estamos amosando aos turistas unha praia fluvial moito máis coidada, que se suma ao románico, á gastronomía e a outros reclamos como O Cabo do Mundo, que se poden aprezar no noso municipio e, máis concretamente, na cunca do Miño”, manifesta o rexedor.