Os deputados no Congreso por Lugo e Ourense, Jaime De Olano e Joaquín García Díez e Celso Delgado, respectivamente, acompañados da voceira do PP en Monforte, Katy Varela, e da deputada autonómica, Raquel Arias, mantiveron este venres, 17 de xullo, unha xuntanza con representantes sindicais de Renfe e Adif para abordar “a supresión e parálise de varias liñas de tren levadas a cabo polo Goberno Central e consensuar as próximas iniciativas que os populares levarán a cabo nos vindeiros meses”.
Deste xeito, acordaron presentar na Cámara Baixa varias propostas que se engloban en tres eixos de actuación. Primeiro, demandar do Goberno de Sánchez a recuperación das frecuencias entre Lugo-Monforte-Ourense e con outros puntos de España, de forma que este servizo non só acade o funcionamento existente antes da aparición do covid, senón que se establezan novas comunicacións como pode ser a do tren-hotel. Segundo, aumentar a plantilla de maquinistas e dotar de máis persoal outros servizos que son deficitarios para que a calidade do servizo non sexa aínda máis precaria e, terceiro, recuperar o cronograma que deixara encamiñado o Partido Popular durante o seu mandato e que incluía unha redución dos tempos entre Lugo-Ourense e a conexión da Alta Velocidade coas variantes de Oural e Canaval, así como a electrificación das liñas e a mellora das vías.
Dende o PP aseguran que non permitián que se empregue a Covid como escusa “para seguir acabando cun servizo que, durante moito tempo, supuxo unha das principais comunicacións de Lugo e unha fonte de emprego moi importante na zona sur”.
Mocións no Senado, nos Concellos e noutras administracións
Os populares tamén farán esta petición no Senado, nos Concellos e noutras administracións, de xeito coordinado porque, co inicio do estado de alarma, sinalan que, “Renfe deseñou un plan de transporte, que incluíu a cancelación e/ou redución da súa oferta relacionada cos trens comerciais AVE, Longa Distancia, Media Distancia e Avant.”
Afirman que se eliminaron 29 trens en Galicia dos que 22 afectan directamente a Monforte de Lemos. Entre estas conexións suprimidas, destacan os trens hoteleiros que conectaban Lugo con Barcelona e Lugo con Madrid.
